Woasch eh letzte Wochn hab I no von alles nette Leit gredet, des kunn I de Wochn nimmer. Weil die letschten Tag hab I mi a paar mal sakrisch g‘ärgert. I hab mi so g‘ärgert, dass I so viel gfressn hab, dass i alleweil fetter wordn bin.

 

 Schuld dran is a Togeszeitung, welche wissts eh olle selba, de iatz seit a Wochn alleweil Sochn schreibt, von denen I nit woas, wos de herhabn. I woas eh, de wos do schreibn sein ja alles junge Buam und Madln, dass de nit olls wissn kennen, sogt jo koaner wos, aber wenn I schu in a Zeitung schreib, donn muass i decht a bissl aupassen, wos i schreib, obs a richtig isch, denk i mir halt amol. Weil wia da oane gschriebn hat, dass die Mitglieda an der Misere Schuld sein, des isch dechtasch der greaschte Schmorrn, weil de kennen jo eh alleweil lei fiar jo oder jo stimmen bei de Generlitätsversammlungen oder wia des hoasst. Aber interessant isch, wia viela leit des olles glabn. Woasch eh, mir sein in Tirol und die Leit do glabn halt fascht alles was irgendwo gschriebn steht. Mei Enkele hots ma zoagt in so am komischen Forum wos de Leit do alles fiarn Bledsinn verzapfn, Der Adler, der mehr siecht, bei mir heroben hot ma a no gsteckt, dass a poor von de Schreiba selber Vereinsmitglieda sein, jo bittschen kann de koaner amal zu am Vereinsabend einladn, damit man denen erklären kann, was des isch a Mitgliedaverein?
Oba bei eppas hams eh recht ghabt, der Rosn is nit zum Fussball spieln - aber so neich is des a wieda nit - des hab i scho vor zwoa Wochn gsagt - jojo lei nit auf die olten horchen...

Woasch eh, alle habn iatz die Panik wegn dem osteign - aber i hab des schon oft erlebt, des kennts ma glabn - der Wacker isch alleweil wieda kemmen - des werd desmol a so sein - da mach i ma koane Sorgn.
Die Hauptsach isch mir machn koane Schulden und holen ins alleweil Spieler de eh fascht nix koschten, wia der Heli alleweil sogt. Wia de zwoa Afrikaner , de koschten ins ja wirklich gor nix - lei im Monat soviel wia I in 10 Monat Rent‘n kriag. Oba scheinbor is des heitzutagn nimmer viel, bzw. gor nix, woasch eh.


Pfiat enk eier Wackermandl!

Satire rund um den Wacker Innschbrugg